آلصمت له عندي معزّه ومقدار

بسم الله الرحمن الرحيم






◊







آلصمت له عندي معزّه ومقدار
.................... في زحمة الافواه .. يا مزين الصمت !!


لا صار بعض البوح عند البشر عار
.................... لو يشتعل جوفي حشى ما تكلّمت


تعبت من قولة : (علامك) و (وش صار )
.................... وان طحت ما ألقى سوى كلمة (سلمت)


واعذار اخلقها ولو مالي اعذار
.................... مشّيتها مره .. ومرات ما رمت !!


كذبة صباح الخير/ يا صبح الانوار
.................... عذري ليا عدّت ... ليالي ولا نمت


اسهر طوال الليل وضْيوفي افكار
.................... واقول لاْصحابي : نعم توّني قمت !!


ما عاد فيني ألفت .. عْيون واْنظار
.................... يكفي بأني من زماني .. تعلّمت


ان الصدر بيت/ن .. وسكّانه اسرار
.................... نيّام .. بس يصحون لامن تألّمت


يصحون ويناظرهم الجار والمار
.................... وش عاد ينفع سترهم لو تكتّمت ؟!!


آقدّم اقدامي على درب الاصرار
.................... امشي ولكن للأسف ما تقدّمت


(النار قدامي .. ومن خلفي النار !!)
.................... والعمر يمضي بي وانا ... ما تولّمت


يا لين ذاك الحلم في ... لحظه انهار
.................... وانا مع لحظة سقوطه ... تحطّمت


اجروحي اكثار.. وتناهيدي اكثار
.................... لكن على كثر المواجع .. تبسّمت !!


ثم أْلتزمت الصمت .. وعزومي اكبار
.................... ولو يشتعل جوفي حشى .. ما تكلّمت


وسلامتكم

و إنما الأمم الأخلاق ما بقيت *** فإن هم ذهبت أخلاقهم ذهبوا

و إذا أصيب القوم في أخلاقهم *** فأقم عليهم مأتما و عويلا

صلاح أمرك للأخلاق مرجعه *** فقوّم النفس بالأخلاق تستقم

و ما الحسن في وجه الفتى شرفا له *** إذا لم يكن في فعله و الخلائق

قالوا علامك صـامت وقلت ياناس= كثر الكلام يقل لاجله مقامي
الصمت حكمه والحكي مــصدر إفلاس= ولقيت في صـمـتي يزيد احترامي
الصمت له معنى وله ذوق وإحســـاس= مركب نجاتك في بحـور الظلامي
ترى الرجل صوره من الـراس للساس= ثم يتبين جوهــره بالكلامي
إما نطق في كلمة ترفــع الرأس= تضفي على شكله جــديـد الاسامي
وإلا يعود معدنه مـــعــدن نحاس=يرميه سهمه بـعــد ماكان رامي
لا صار عندك من ثمـيـنات الألماس=خله بـصـدرك لين وقت التمامي
أخاف يطلعلك مـن الناس بلاس=وإلا سـفــيه ما يرد السلامي
الله خلق خلقه على عـدة أجناس=وكلن يسوقه مذهـبه للأمامي
والله خلق بالطير قمري وقرناس=ووقت الهدد ما ينغزي بالحـمـامي
لا جال في صدرك من الهم هوجاس=وعينك يحاربهـا لذيذ المنامي
ونفسك عليله والفكر صار محتاس=اترك طمان القـاع وارق السنامي
عليك بالعالي ليا هب نسـناس=يبري الجروح الخـافيه والعظامي
وخلك لربـعـك دايم الدوم نـبراس=وخص القريب وخص ولد العــمامي
خلك لهم في داجي الليل مقـباس=ولصاحب أصدق من حقوق الغمــامي
ربعك ذراك ليا لحق راســك البـاس=قدم لهم شربك ولو كنت ضـامي
وخلك لثوب الطيب والعز لبـاس=واترك دروبٍ تنتهي بالحرامي
وفعل الجميل وواجب الضيف نومـاس=ومن لا نفع بالضـيق نفعه عدامي
بيت الكريم أبوابه بدون حـراس=وبيت البخيل يـعـد مثل الهدامي
كلٍ بها الدنيا نصيبه بـمقياس=ياخذ نصيبه لوجــفـوه الأنامي